Social Responsibility

Social Responsibility

Tele10 yahembye abitwaye neza mu mwaka w’imikino wa Volleyball 2016-2017

Ku mugoroba wo kuri uyu wa Gatatu tariki ya 4 Ukwakira 2017 ni bwo ikigo cya Tele10 gifite TV na Radio10 bahembye abakinnyi, abatoza, amakipe yitwaye neza mu mwaka w’imikino 2016-2017 muri Volleyball ndetse banashimira amashyirahamwe n’abantu ku giti cyabo bagaragaza umusaruro muri siporo.

Ni ibirori byabereye muri sitidiyo za TV10 biyobowe na Bagirishya Jean de Dieu uzwi nka Jado Castar afatanyije na Rigoga Ruth cyo kimwe na Nsengiyumva Sidiq batambutsaga iby’uyu muhango kuri iyi televiziyo.

Abayobozi mu nzego zitandukanye za siporo, haba amakipe, Komite Olempike, Minisiteri y’umuco na siporo n’abandi bari babukereye ngo barebe icyo bari bahishiwe kuri uyu mugoroba wari umaze iminsi uvugwa.

Ku ikubitiro hahembwe Ishuli rya Groupe Scolaire Officiel de Butare nk’ikipe yatwaye igikombe mu cyiciro cya kabiri (Serie B), Gisagara VC ihembwa nk’ikipe yatwaye igikombe cya shampiyona, APR Women Volleyball Club nk’ikipe yatwaye irushanwa ryo kwibuka, RRA Women VC itwara igihembo nk’ikipe yatwaye shampiyona.

Kirehe VC yatwaye igihembo nk’ikipe yatwaye irushanwa rya Carre d’Ace 2017 no kwibuka Kayumba. Munezero Valentine (IPRC Kigali VC) yahembwe nk’umukinnyi ukiri muto utanga icyizere mu cyiciro cy’abali n’abategarugoli mu gihe Ndahayo Dieu Est La yahembwe mu cyiciro cy’abagabo.

Mu guhemba abasifuzi bitwaye neza, Uwanyirigira Beatrice yahembwe nk’uwahize abandi mu cyiciro cy’abagore naho Harerimana Herma ahiga abagabo bagenzi be bafatanya muri uyu mwuga.

Nyirimana Fidele yahembwe nk’umutoza wahize abandi utoza mu cyiciro cy’abagabo naho Ngendahayo Eugene utoza ST.Alloys Rwamagana ahembwa nk’uwabahize mu batoza bafasha amakipe y’abagore.

Mukandayisenga Benitha ukinira St.Alloys Rwamagana ni we wabaye umukinnyi mwiza w’umwaka mu gihe Mutabazi Yves (APR VC) yabaye umukinnyi w’umwaka mu bagabo naho muri Serie B hahembwe Dusengimana Wilcliff wa GSOB VC.

Mu gushimira amashyirahamwe agaragaza ubwitange muri siporo bashinzwe kureberera, Ishyirahamwe ry’umukino wa Basketball mu Rwanda (FERWABA) ryahembwe nk’ishyirahamwe riri guteza imbere uyu mukino bashingiye mu kuzamura abana bakiri bato (Grass-Roots).

Muri uru rwego hahembwe ishyirahamwe ry’umukino w’amagare mu Rwanda (FERWACY) nk’ishyirahamwe rihiga ayandi mu kugera ku ntego, aha ni naho Ishyirahamwe ry’umukino wa Cricket mu Rwanda (RCA) bahawe igihembo nk’ishyirahamwe ryazamuye ibendera ry’u Rwanda mu guca uduhigo ku rwego rw’isi. Uwamahoro Cathia na Dusingizimana Eric baciye uduhigo two kumara amasaha menshi bakina uyu mukino.

Lt.Col. Patrice Rugambwa wahoze ari umunyamabanga uhoraho muri Minisitero y’umuco na siporo yatwaye igihembo cy’umuntu wagaragaje ubwitange n’urukundo kuri Volleyball  byaba mu gukurikira aho amarushanwa atandukanye yaberaga ndetse no gutanga inama n’ibitekerezo byazamura uyu mukino.  Akarere ka Gisagara na Kirehe twahembwe nk'uturere tw'indashyikirwa mu guteza imbere siporo by'umwihariko umukino wa Volleyball.

Dore abatwaye ibihembo n’ibyo bahawe:

Abakinnyi beza b’umwaka (MVP):

-Mu bagabo ni Mutabazi Yves usanzwe ukinira APR VC

-Mu Bagore ni Mukandayisenga Benitha Ukinira Groupe Scolaire Sainte Aloysie Rwamagana

- Mu bakina Serie ni Ndahayo Willy Cliff ukinira GSOB VC

Buri wese yahawe Igikombe, Igikapu kirimo imyenda (Training), Inkweto za siporo, genouillere ndetse na Kit Complet ya DSTV.

Abatoza beza b’umwaka:

- Mu batoza amakipe y’abagabo hahembwe Nyirimana Fidele utoza Kirehe V.C.

-Mu batoza abari n’abategarugoli hahembwe Ngendahayo Eugène utoza Groupe Scolaire Sainte Aloysie Rwamagana

Buri we se yahawe igikombe, imyenda (training),Inkweto za siporo, Genouillere ndetse na Kit Complet ya CANAL+

Abasifuzi beza b’umwaka

-Mu bagore umusifuzi mwiza yabaye Uwanyirigira Beatrice

-Mu bagabo hahembwe Harerimana Herman

Buri wese yahawe igikombe, Imyenda(Training), inkweto za siporo, ndetse na Kit complet ya CANAL+

Abakinnyi bato batanga icyizere:

-Mu bagore hahembwe Munezero Valentine ukinira IPRC Kigali akaba anakina Beach Volleyball

-Ndahayo Dieu est la ukinira IPRC East VC

Buri wese yahembwe igikombe, Igikapu kirimo imyenda (training), Inkweto za siporo, Genouillere ndetse na kit complet y CANAL+

Ikipe yahize izindi uyu mwaka Seria A cyangwa icyiciro cya mbere mu bagabo

Gisagara Volleyball Club yahembwe nk’ikipe yatwaye igikombe cya Shampiyona.

Ihabwa Igikombe, Imyenda yo gukinana ikipe yose, Imipira 4 yo gukina (Mikasa), Urushundura rwo gukiniraho (Fillet) ndetse na Kit Complet ya CANAL+

Ikipe yahize izindi uyu mwaka mu bagore:

Rwanda Revenue Authority Women Volley Ball Club (RRA WVC) yahembwe nk’ikipe yatwaye igikombe cya shampiyona mu bali n’abategarugoli. Yahawe igikombe, imyenda yo gukinana ikipe yose, imipira 4 yo gukina (Mikasa), Urushundura rwo gukiniraho (Fillet) ndetse na Kit Complet ya CANAL+

Ikipe yagaragaje uguhangana uyu mwaka ni Kirehe Volleyball Club yahembwe nk’ikipe yagaragaje uguhangana uyu mwaka ndetse ikaba yaranatwaye irushanwa ryo kwibuka Kayumba. Yahawe, imyenda yo gukinana ikwira ikipe yose, Imipira yo gukina 4 (Mikasa), Urushundura rwo gukiniraho (Fillet) ndetse na Kit Complet ya CANAL+

Ikipe y’itwaye neza muri rusange mu bagabo:

APR Volleyball club (M) yahembwe nk’ikipe yitwaye neza muri rusange mu mwaka wose w’imikino.Yahawe imyenda yo gukinana ikipe yose, imipira 4 yo gukina (Mikasa) ndetse Urushundura rwo gukiniraho

Ikipe yitwaye neza muri rusange mu bari n’abategarugoli: APR volleyball club (W) yahembwe nk’ikipe yitwaye neza muri rusange mu mwaka wose w’imikino. Yahembwe imyenda yo gukina ikipe yose, Imipira 4 yo gukina(Mikasa), ndetse n’urushundura rwo gukiniraho

Ikipe nziza y’umwaka mu cyiciro cya 2 (Serie B):

GSOB Indatwa n’Inkesha ni yo yahembwe nk’ikipe yitwaye neza mu cyiciro cya  2 cyangwa Serie B. Yahawe igikombe, imyenda yo gukinana ikipe yose, imipira 3 yo gukina (Mikasa), ndetse n’urushundura rwo gukiniraho.

Kuri ibi bihembo kandi hiyongereyeho guhemba uturere 2 twagaragaje imbaraga mu guteza imbere volleyball. Akarere ka Gisagara kahawe igikombe gashimirwa guteza imbere umukino wa Volleyball ndetse kakanubaka Gymnase. Akarere ka Kirehe nako kahawe igikombe gashimirwa imbaraga gashyira muri  sports na Volleyball kandi gakoresheje abavuka aho bakiri bato.

Umutoza Paul Bitok nawe yahawe igikombe, Imyenda ya Siporo n’inkweto za Siporo ashimirwa guteza imbere umukino wa Volleyball muri rusange. Lt. Col Rugambwa Patrice nawe yahawe igikombe, Imyenda ya Siporo n’Inkweto za Siporo nk’umwe mu bayobozi wagerageje kugaragaza imbaraga mu gufasha umukino wa Volleyabll gutera imbere.

Uretse ibi bihembo byahawe abakinnyi n’umuryango wa Volleyball muri rusange hanatanzwe ibihembo ku mashyirahamwe atandukanye ashimirwa uko agerageza kwitwara muri siporo. FERWABA yahawe igikombe nk’ishyirahamwe ryagaragaje impano no kwita ku bakiri bato mu guteza imbere siporo mu Rwanda.

FERWACY yahawe igikombe ishimirwa nk’ishyirahamwe ryagaragaje kwita ku bakinnyi n’umukino w’amagare muri rusange kandi rikaba intangarugero ku yandi ma shyirahamwe. Rwanda Cricket Federation yahawe igikombe nk’ishyirahamwe ryagaragaje kwigira no guhatanira ishema ry’igihugu n’abakinnyi kandi bivuye muri bo ubwabo.